LUKSEMBURG, 13 Tetor 2026 — Kryeministri Edi Rama ka zhvilluar sot një vizitë zyrtare në Luksemburg ku u prit nga homologu i tij, Luc Frieden, në një kohë kur në Tiranë studentët po zhvillojnë protesta duke kërkuar dorëheqjen e kreut të qeverisë.

Përmes një reagimi në rrjetet sociale, Rama bëri me dije se fokusi i bisedimeve me kryeministrin Frieden ishte e ardhmja e marrëdhënieve dypalëshe dhe ecuria e procesit të integrimit evropian të Shqipërisë.

“Luksemburg – Me Kryeministrin Luc Frieden, për marrëdhëniet dypalëshe dhe rrugëtimin europian të Shqipërisë,” u shpreh Rama.

Përveç agjendës politike e diplomatike, kreu i qeverisë njoftoi edhe arritjen e një marrëveshjeje në fushën e transportit ajror, duke konfirmuar se nga muaji mars i vitit të ardhshëm do të nisë fluturimi i drejtpërdrejtë mes Luksemburgut dhe Shqipërisë përmes kompanisë ajrore kombëtare "LuxAir".