UASHINGTON, 13 Tetor 2026 — Ambasadorja e Shteteve të Bashkuara në Greqi, Kimberly Guilfoyle, ka zyrtarizuar dorëheqjen e saj nga detyra pas kërkesës së drejtpërdrejtë nga Shtëpia e Bardhë, duke shoqëruar largimin me një deklaratë ku mohon kategorikisht akuzat për kërkesë të paligjshme parash.

Largimi i saj vjen pas raportimeve të The Wall Street Journal, sipas të cilave Guilfoyle kishte kërkuar 100 mijë dollarë nga një donator i Presidentit Donald Trump përpara seancës së saj të konfirmimit në Senat vitin e kaluar.

Përmes një reagimi publik në rrjetet sociale, Guilfoyle konfirmoi dorëheqjen, ndërsa theksoi se do të mbrojë integritetin e saj ndaj atyre që i cilësoi si shpifje:

“Dëshiroj gjithashtu të trajtoj akuzat e ngritura së fundmi ndaj meje. Këto akuza janë të pavërteta dhe kam ndërmend të mbroj me vendosmëri emrin, reputacionin dhe integritetin tim. Nuk do të lejoj që akuzat e rreme të përcaktojnë dekadat e shërbimit tim publik,” deklaroi ajo.

Pavarësisht rrethanave të largimit, ish-ambasadorja shprehu mirënjohje për Presidentin Donald Trump dhe Sekretarin e Shtetit Marco Rubio, duke nënvizuar arritjet e mandatit të saj diplomatik në Athinë, me fokus te zgjerimi i eksporteve të gazit natyror të lëngshëm (LNG), ulja e varësisë energjetike evropiane nga Rusia dhe forcimi i partneritetit ushtarak në kuadër të NATO-s.