ATHINË — Autoritetet greke po hetojnë ekzekutimin e 52-vjeçarit shqiptar N.G., i cili u vra mëngjesin e së diellës në zonën e Glyfadas në jug të Athinës.

Sipas të përditshmes greke Kathimerini, hetuesit dyshojnë se prapa vrasjes qëndron një bandë rivale e trafikut të drogës e përbërë nga shtetas shqiptarë, ndërsa po ekzaminohet edhe një lidhje e mundshme me një përplasje të ndodhur në Pire në fund të majit, ku mbeti i plagosur dhe i arrestuar nga policia personazhi i njohur kriminal me nofkën “Titi”.

Viktima, i cili kishte një skedë të ngarkuar penale për zhvatje, dhunë në familje dhe përplasje tifozësh, punonte si roje sigurie në një lokal nate në bregdet. Policia dyshon se zgjerimi i tij i fundit në rrjetin e shpërndarjes së lëndëve narkotike ka nxitur konfliktin për kontrollin e territoreve.

Autorët i kishin zënë pritë 52-vjeçarit pranë banesës së tij teksa e ndiqnin me motor, duke e qetuar tetë herë — shtatë goditje në shpinë dhe një në kokë. Sektori i Krimeve Kundër Jetës po analizon pamjet e kamerave të sigurisë për të bërë të mundur identifikimin e ekzekutorëve.