BALLSH — Ish-drejtuesi i repartit zjarrfikës në Mallakastër, Armand Aliaj, është sulmuar fizikisht mëngjesin e sotëm rreth orës 07:00 brenda ambientit të lokalit të tij në Ballsh, nga persona ende të paidentifikuar që mbanin maska.

Sipas të dhënave të para, Aliaj ndodhej i vetëm në ambientet e biznesit të tij kur është goditur pas shpine me levë. Autorët janë larguar me shpejtësi nga vendngjarja me një automjet të tipit Audi Q5.

I dëmtuari ka shkuar vetë në spitalin e Ballshit ku ka marrë ndihmën e parë mjekësore për dëmtime në ballë, duar dhe shpatull, për t’u transportuar më pas drejt Spitalit të Fierit për ekzaminime më të detalizuara. Gjendja e tij shëndetësore raportohet e qëndrueshme.

Përpara oficereve të policisë, Armand Aliaj ka deklaruar se nuk ka pasur konflikte me askënd, ndërsa motivet e këtij sulmi mbeten ende të paqarta. Policia e Shtetit ka nisur hetimet për identifikimin dhe kapjen e autorëve.