ROMA — Kompania ajrore australiane Qantas ka pezulluar përkohësisht fluturimin e kthimit të një avioni tip Boeing 787 Dreamliner nga Roma drejt Perthit, pas zbulimit të pleshtave të shtratit në pjesën e përparme të kabinës së klasit ekonomik.

Incidenti u konstatua gjatë udhëtimit të datës 9 tetor, çka detyroi linjën ajrore të anulonte fluturimin e kthimit të planifikuar për më 10 tetor me qëllim kryerjen e një pastrimi të thelluar dhe dezinfektimin e plotë të mjetit fluturues. Kompania iu kërkoi falje pasagjerëve të prekur, duke iu siguruar akomodim dhe rirezervim në fluturime të tjera, ndërsa sqaroi se kabinat u nënshtrohen procedurave të dezinfektimit parandalues çdo 50 ditë.

Ekspertët e parazitologjisë vlerësojnë se hyrja e insekteve në kabinë mund të ketë ardhur përmes valixheve apo veshjeve të vetë udhëtarëve nga ambientet e akomodimit, ndërsa trajtimi i tyre kërkon përdorimin e insekticideve specifike ose nxehtësi të lartë rreth 55°C.