TIRANË — Agjencia e Mbikëqyrjes Policore (AMP) ka arrestuar në flagrancë dy punonjës të Patrullës së Përgjithshme pranë Komisariatit të Policisë Nr. 4 në Tiranë, të cilët akuzohen për korrupsion pasiv dhe shpërdorim detyre.

Efektivët e ndaluar janë identifikuar si inspektorët A. S., 20 vjeç, dhe Xh. F., 23 vjeç. Sipas hetimit të nisur pas kallëzimit të një qytetari, dy punonjësit e policisë i kanë kërkuar dhe marrë atij shumën prej 20 mijë lekësh në këmbim të mosvendosjes së një mase administrative për shkelje rrugore.

Procedimi po ndiqet nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndërsa dy efektivët dyshohen për veprat penale “Korrupsioni pasiv i personave që ushtrojnë funksione publike” dhe “Shpërdorimi i detyrës” në bashkëpunim. AMP njoftoi se hetimet po vijojnë për dokumentimin e plotë të ngjarjes dhe verifikimin e mundshëm të personave të tjerë të implikuar.