LUKSEMBURG — Shqipëria shënon një tjetër arritje në rrugëtimin e saj drejt anëtarësimit në Bashkimin Europian, me zhvillimin e Konferencës së 10-të Ndërqeveritare Shqipëri–BE sot në Luksemburg.

Gjatë këtij takimi të nivelit të lartë pritet të formalizohet mbyllja e negociatave për Kapitullin 20, “Ndërmarrjet dhe Politikat Industriale”. Me përmbylljen e këtij kapitulli, që përfshin zhvillimin e sipërmarrjes, mbështetjen e bizneseve, inovacionin dhe rritjen e konkurrueshmërisë ekonomike, numri i kapitujve të mbyllur përkohësisht nga Shqipëria arrin në katër, duke i shërbyer objektivit për përmbylljen e plotë të negociatave brenda vitit 2027.

Sipas agjendës zyrtare të publikuar për ngjarjen:

16:40 – Nisja drejt Qendrës Europiane të Konventave.

16:45 – Prononcimi për mediat (Doorstep).

16:50 – Fotografia e përbashkët e Kryeministrit Edi Rama, Komisioneres për Zgjerimin Marta Kos dhe Ministrit irlandez Thomas Byrne.

17:00 – Hapja e Konferencës së 10-të Ndërqeveritare Shqipëri–BE dhe miratimi i agjendës.

17:45 – Përfundimi i punimeve të konferencës dhe mbajtja e konferencës së përbashkët për shtyp nga Kryeministri Edi Rama, Komisionerja Marta Kos dhe Ministri Thomas Byrne.