Një grabitje nën kërcënimin e armës së zjarrit është regjistruar rreth orës 04:05 në lagjen “5 Maji” në Elbasan. Disa persona të paidentifikuar kanë marrë katër telefona celularë dhe një shumë parash nga banesa e shtetasit L. Z.

Pas mbërritjes së Policisë, autorët janë larguar drejt një zone kodrinore, duke braktisur automjetet. Gjatë kontrolleve janë sekuestruar dy automjete, si dhe veshje të ngjashme me uniformat e Policisë.

Vijon puna për identifikimin dhe kapjen e autorëve, si dhe për zbardhjen e plotë të ngjarjes.

Elbasan/Informacion paraprak

Në lagjen “5 Maji”, shtetasi L. Z. ka njoftuar se rreth orës 04:05 të mëngjesit, disa persona të paidentifikuar janë futur në banesën e tij dhe, nën kërcënimin e armës së zjarrit, i kanë marrë 4 telefona celularë dhe një shumë parash.

Menjëherë pas marrjes së njoftimit, shërbimet e Policisë kanë shkuar në vendngjarje. Sapo kanë konstatuar praninë e shërbimeve të Policisë, personat janë larguar në drejtim të zonës kodrinore, duke përfituar nga errësira, dhe kanë braktisur automjetet. Vijon ndjekja për kapjen e tyre.

Në vijim të veprimeve, janë gjetur dhe sekuestruar 2 automjete, të dyshuara se janë përdorur gjatë ngjarjes, veshje të ngjashme me uniformat e Policisë dhe prova të tjera që do t’i shërbejnë grupit hetimor për zbardhjen dhe dokumentimin e rastit.

Po punohet për zbardhjen e plotë të rrethanave, identifikimin dhe kapjen e personave të përfshirë në ngjarje.