Gjykata e Shkallës së Parë e Juridiksionit të Fierit ka pranuar kërkesën e mbrojtjes për lirimin e Sokol Hoxhës, i cili ishte shpallur në kërkim për vrasjen e dy vëllezërve Banaj në vitin 1997 pas një debati për një kasetofon makine.

Sokol Hoxha ishte dënuar në mungesë me 25 vite burg, pasi në atë kohë nuk ishte bërë i mundur arrestimi i tij. Pas ngjarjes, ai kishte arritur të largohej nga Shqipëria dhe të shkonte në Shtetet e Bashkuara të Amerikës, ku u arrestua pas më shumë se 25 vitesh. Më pas, ai u ekstradua drejt Shqipërisë, pasi ishte shpallur në kërkim nga autoritetet shqiptare.

Pas mbërritjes në gusht në Shqipëri, Hoxha u dërgua në ambientet e paraburgimit në burgun e Fierit.

Seanca gjyqësore ndaj tij nisi paraditen e sotme, në orën 11 : 15, citon noa.al portalin lokal alb365. Gjatë procesit, prokuroria e përfaqsuar nga Malbora Dinaj kërkoi që ai të mbahej në burg, duke argumentuar edhe se Hoxha ishte dënuar me burgim të përjetshëm në Belgjikë për vrasjen e një shtetasi.

Nga ana tjetër, dy avokatët e tij Toto Avdija dhe Rozeta Plaku kërkuan lirimin, me argumentin se kishin kaluar 25 vite nga momenti kur vendimi i dënimit kishte marrë formë të prerë dhe se autoritetet shqiptare nuk kishin arritur ta arrestonin për të vuajtur dënimin.

Sa i përket dënimit të dhënë nga drejtësia belge, mbrojtja pretendoi se nuk ekzistonte një kërkesë nga autoritetet belge për shpalljen e tij në kërkim ndërkombëtar lidhur me vrasjen e shtetases Brunilda Dervishi në Belgjikë.

Pas dëgjimit të pretendimeve të prokurorisë dhe mbrojtjes, gjyqtarja Aurora Tusha vendosi të pranonte kërkesën e avokatëve, duke urdhëruar lirimin e Sokol Hoxhës.

Avokatët e Hoxhës pohuan se për çështjen e vrasjes së dy vëllezërve Banaj në 1997 në Patos kishin kaluar 29 vjet dhe klienti i tyre ka fituar lirinë, por tashmë ai ka një çështje tjetër që duhet të përballet me drejtësinë.