Kalove jashtë vijave të bardha? Policia Rrugore ka nisur kontrollet edhe ndaj këmbësorëve. Vetëm në 24 orë janë vendosur 78 gjoba në Tiranë

Policia Rrugore e Tiranës ka intensifikuar kontrollet jo vetëm ndaj drejtuesve të automjeteve, por edhe ndaj këmbësorëve që nuk respektojnë rregullat e qarkullimit rrugor.

Vetëm gjatë 24 orëve të fundit, 78 qytetarë janë ndëshkuar me masa administrative pasi janë konstatuar duke kaluar rrugën në vende të palejuara ose duke mos përdorur vendkalimet e përcaktuara për këmbësorët.

Sipas Policisë, kontrollet janë përqendruar në evidentimin e shkeljeve nga këmbësorët, me synim rritjen e sigurisë rrugore dhe parandalimin e aksidenteve.

Policia Rrugore u bën apel qytetarëve që të respektojnë sinjalistikën, të përdorin vijat e bardha dhe vendkalimet e përcaktuara, si dhe të shmangin kalimin e rrugës në zona të palejuara.

Kontrollet ndaj këmbësorëve pritet të vijojnë edhe në ditët në vazhdim, si pjesë e masave për forcimin e disiplinës në trafik dhe mbrojtjen e jetës së përdoruesve të rrugës. /noa.al