KRUJË — Një ngjarje e rëndë me pasojë vdekjen e një të mituri ka ndodhur në fshatin Arrameras të Fushë-Krujës, ku një 16-vjeçar ka humbur jetën gjatë orarit të punës si pasojë e shkëputjes së ashensorit në ambientet e një restoranti.

Shërbimet e Policisë së Krujës kanë vënë në pranga dy persona. I arrestuari i parë është kolegu 26-vjeçar i viktimës (E. S.), i dyshuar për veprën penale të vrasjes nga pakujdesia, pasi hetimet e para tregojnë se ai e ka shtyrë me duar të miturin brenda ashensorit përpara se të ndodhte shkëputja fatale.

Ndërkohë, policia ka arrestuar edhe pronarin 62-vjeçar të lokalit (A. V.), ndaj të cilit rëndojnë akuzat për shkelje të rregullave të mbrojtjes në punë si dhe fshehje të të ardhurave. Dosja hetimore i është përcjellë Prokurorisë pranë Gjykatës së Shkallës së Parë për veprime të mëtejshme ligjore.

Njoftimi i policisë:

Krujë

Specialistët e Komisariatit të Policisë Krujë arrestuan në flagrancë shtetasit:

-E. S., 26 vjeç, për veprën penale “Vrasja nga pakujdesia”;

-A. V., 62 vjeç, për veprat penale “Shkelja e rregullave të mbrojtjes në punë” dhe “Fshehja e të ardhurave”.

Arrestimet u kryen pasi dyshohet se më datë 11.10.2026, në fshatin Arrameras, Fushë Krujë, në restorantin në pronësi të shtetasit A. V., shtetasi E. S., kamerier i lokalit, ka shtyrë me duar një 16-vjeçar (i punësuar kamerier në lokal), brenda në ashensor, dhe si pasojë e shkëputjes së ashensorit, 16-vjeçari ka humbur jetën.

Materialet procedurale iu referuan Prokurorisë, për veprime të mëtejshme.