LEZHË — Treshja e ndaluar gjatë aksionit policor “Detajet” do të njihet me masën e sigurisë në Gjykatën e Shkallës së Parë në Lezhë, nën një prani të shtuar të forcave të rendit.

Gjykata do të vlerësojë masën e arrestit për Vinçesk Pirolin (38 vjeç), Kristian Ymerin (34 vjeç) dhe Elden Tarjën (25 vjeç). Hetimet e kryera zbulojnë se dy të parët lëviznin të maskuar me skafandra të zeza dhe të armatosur me pistoleta në bordin e një motori të bardhë të vjedhur në Suedi, përgjatë rrugës së vjetër Pllanë–Lezhë, me synim ekzekutimin e një personi. I riu tjetër dyshohet se kishte rolin e lehtësuesit për largimin e tyre nga vendngjarja me një automjet tip "Volkswagen".

Hetuesit po vijojnë punën për zbardhjen e plotë të objektivit të këtij sulmi të parandaluar, si dhe për verifikimin e përfshirjes së të dyshuarve në ngjarje të tjera kriminale në vend.