RIAD — Detaje të reja janë publikuar nga autoritetet ushtarake të Arabisë Saudite lidhur me sulmin e ri ndaj Aeroportit Ndërkombëtar "King Khalid" në Riad, ku mbeti i vrarë një person dhe u plagosën 11 të tjerë.

Sipas të dhënave të përditësuara nga forcat e koalicionit ushtarak, zjarri në Terminalin 4 të aeroportit u shkaktua nga rënia e një predhe të paidentifikuar, ndërsa menjëherë pas goditjes sistemet e mbrojtjes ajrore saudite arritën të neutralizonin një raketë lundruese në afërsi të zonës aeroportuale.

Përveç mbrojtjes së kryeqytetit, autoritetet saudite raportuan gjithashtu se forcat e sigurisë kanë shkatërruar një dron sulmues në Provincën Lindore, si dhe kanë neutralizuar në ajër një raketë balistike të lëshuar nga rebelët Houthi në drejtim të qytetit jugor të Khamis Mushait.

Sulmet e njëpasnjëshme vijnë pas goditjes së një dite më parë, e cila shkaktoi 13 viktima dhe mbi 300 të plagosur.