SARAJEVË — Rezultatet e zgjedhjeve të 4 tetorit në Bosnjë e Hercegovinë kanë rihahur mundësinë e formimit të qeverisë shtetërore nga tre partnerët e vjetër koalicioni: Lidhja e Socialdemokratëve të Pavarur (SNSD), Bashkimi Demokratik Kroat (HDZ BiH) dhe Partia e Veprimit Demokratik (SDA).

Sfidë kryesore për funksionimin e kabinetit të ri mbetet përplasja mes orientimit perëndimor dhe ndikimit rus. Udhëheqësi i SNSD-së, Millorad Dodik, i cili mban qëndrime të hapura proruse dhe u takua me presidentin rus Vladimir Putin pak ditë para zgjedhjeve, kundërshton anëtarësimin në NATO dhe reformat e kërkuara nga BE-ja. Nga ana tjetër, Bashkimi Evropian dhe NATO kanë bërë thirrje për formimin e shpejtë të institucioneve dhe zbatimin e 113 masave reformuese që mbeten të pezulluara.

Përfaqësuesit e Bashkimit Evropian theksuan se nga Bosnjë e Hercegovina pritet përafrim i plotë me politikën e jashtme e të sigurisë të BE-së, përfshirë sanksionet ndaj Rusisë. Ndërkohë, nga selia e Aleancës Atlantike, përmes një reagimi për mediat, zyrtarët e NATO-s deklaruan:

“Një Bosnje dhe Hercegovinë e qëndrueshme dhe e sigurt, si dhe një Ballkan Perëndimor paqësor janë në interesin tonë strategjik. NATO-ja mbështet operacionin Althea të Bashkimit Evropian, i cili zhvillohet në kuadër të marrëveshjes Berlin Plus, dhe nuk do të lejojmë krijimin e një vakumi të sigurisë në Bosnje dhe Hercegovinë. Kërcënimet për shkëputje, përplasjet e brendshme politike, idetë prapavajtëse dhe nacionaliste janë destabilizuese dhe të rrezikshme.”

Analistët politikë vlerësojnë se pa arritjen e një kompromisi minimal mes partive fituese, vendi rrezikon të mbetet në vendnumëro sa i përket integrimit evropian dhe përfitimit të fondeve nga Plani i Rritjes i BE-së për Ballkanin Perëndimor.