KALAMATË / TIRANË — Një 19-vjeçar me shtetësi turke, i shpallur në kërkim ndërkombëtar nga autoritetet shqiptare për tentativë vrasjeje dhe armëmbajtje pa leje, është arrestuar nga policia greke në Rrugën Kombëtare Kalamata–Pylos.

I riu akuzohet se është autori i ngjarjes së regjistruar më 9 mars të këtij viti në një lokal në Sauk të Tiranës, ku mbeti i plagosur me plumb në shpatull bashkatdhetari i tij, Halil Ucar, 36 vjeç. Sipas dinamikës së hetuar nga policia shqiptare, autori kishte qenë duke darkuar në katin e parë të lokalit dhe më pas është ngjitur në katin e dytë ku ndodhej Ucar, duke hapur zjarri ndaj tij përpara se të largohej me shpejtësi nga vendngjarja.

Ndalimi i tij në Greqi u krye gjatë një kontrolli të ushtruar nga oficerët e policisë së Mesinisë në një automjet ku udhëtonin tre shtetas turq të moshës 19, 21 dhe 22 vjeç. Gjatë kontrollit, forcat e rendit sekuestruan 14.7 gramë marijuanë, një sasi të vogël kokaine, katër telefona celularë, si dhe dokumente identiteti e patenta bullgare me autenticitet të dyshimtë.

Nga verifikimet rezultoi se 19-vjeçari ishte subjekt i një Urdhër-Arresti Ndërkombëtar me Njoftim të Kuq (Red Notice) nga Interpol Tirana, ndërsa së bashku me 22-vjeçarin qëndronin ilegalisht në territorin grek. Çështja po ndiqet nga Nëndrejtoria e Prokurorisë dhe Hetimit të Krimeve të Kalamatës për procedurat e mëtejshme të ekstradimit drejt Shqipërisë.