POGRADEC, 11 Tetor 2026 — Historiani dhe studiuesi Auron Tare ka ngritur publikisht alarmimin për gjendjen e mjerueshme të shtëpisë së shkrimtarit dhe intelektualit të shquar shqiptar, Mitrush Kuteli (Dhimitër Pasko). Përmes një reagimi në rrjetet sociale, Tare ka denoncuar se rrënojat e banesës së njeriut të letrave janë braktisur tërësisht dhe po shfrytëzohen si vendgrumbullim mbeturinash.

Sipas denoncimit, ndërtesa ndodhet vetëm 20 metra nga kopshti i poetit Lasgush Poradeci, ndërsa rrugica e ngushtë që historikisht lidhte dy shtëpitë e figurave të mëdha të letërsisë shqipe është bllokuar me mure e gurë. Për të dhënë një mesazh reflektimi, Tare ka shoqëruar denoncimin e tij me pamje nga vendngjarja dhe me një fragment prekës nga letra e lamtumirës së Kutelit drejtuar bashkëshortes së tij, ku i porosiste fëmijët ta duan atdheun dhe gjuhën shqipe "gjer në vuajtje".

Postimi i plotë:

“Rrënojat e Shtëpisë së Mitrush Kutelit”

Prozator, poet e folklorist, publicist, përralltar e kritik letrar, Kuteli i la që në të gjallë kulturës dhe mendimit shqiptar mbi 10 botime letrare.

Shqiptarët i hedhin plehra themeleve të shtëpisë së tij. Vetëm 20 metra nga kopështi i Lasgushit shtëpia është rrënuar dhe ka mbetur vend hedhurinash. Rrugica e ngushtë që dikur lidhte shtëpitë e dy njerzve të letrave është mbyllur me mure dhe gurë si për ti ndarë ata poetë edhe pas vdekjes.

Pjesë nga Letra e lamtumirës për bashkëshorten”

“Fëmijët i porosit ta duan vendin dhe gjuhën tonë gjer në vuajtje. Të mos u shqasë zemra kundër Shqipërisë as kur do të vuajnë pa faj. Atdheu është atdhe, bile atëherë kur të vret. Këtu kanë lindur, këtu të rrojnë me mish e shpirt, qoftë edhe me dhembje”

Dhimitër Pasko (Mitrush Kuteli)