TIRANË, 11 Tetor 2026 — Policia e Tiranës ka zyrtarizuar planin e posaçëm të masave për garantimin e rendit dhe sigurisë publike gjatë ndeshjes derbi mes Partizanit dhe Tiranës, e cila do të luhet mbrëmjen e sotme në orën 18:30 në stadiumin “Arena Kombëtare”.

Për shkak të rivalitetit të lartë dhe numrit të lartë të pritshëm të tifozëve, autoritetet kanë ndërmarrë një sërë kufizimesh dhe udhëzimesh për mbarëvajtjen e aktivitetit:

Bllokimi i akseve rrugore Nga ora 16:00 e ditës së sotme deri në përfundim të ndeshjes, do të ketë bllokim të qarkullimit të automjeteve në disa segmente kyçe pranë stadiumit:

Sheshi “Nënë Tereza”

Rruga “Lekë Dukagjini”

Rruga “Dervish Hima”

Zonat rreth e rrotull stadiumit

Itineraret e lëvizjes së tifozëve Policia ka përcaktuar rrugëkalime të detyrueshme për secilën tifozeri për të shmangur çdo pikë takimi dhe tension:

Tifozët e Partizanit: Nisja nga zona e Inxhinierisë, duke vijuar te rruga “21 Dhjetori”, “Libri Universitar”, përgjatë Presidencës, rruga “Gjergj Filipi”, te “Coin”, për t’u drejtuar më pas te tribuna N.

Tifozët e Tiranës: Nisja nga sheshi “Skënderbej”, pranë ish-Hotel Dajtit, Ura e Dajtit, kthim te ETC-ja, rruga e Elbasanit, rruga “Dervish Hima”, më pas drejt rregës “Sheh Ahmet Pazari”, “Ambasador 3”, për t’u drejtuar te hyrjet V–S.

Rregullat e sigurisë dhe kontrollet në stadium Autoritetet paralajmërojnë kontrolle rigoroze në të gjitha pikat e hyrjes së stadiumit. Nuk do të lejohet futja e sendeve të forta, bidonëve të ujit, çadrave, çelësave metalikë apo lëndëve piroteknike.

Në mënyrë të veçantë, Policia kujton se:

Çdo tifoz duhet të jetë i pajisur detyrimisht me dokument identifikimi (kartë identiteti ose pasaportë). Përndryshe, nuk do të lejohet hyrja.

Fëmijët nën moshën 16 vjeç, edhe nëse kanë biletë, nuk lejohen të hyjnë pa praninë e prindit ose kujdestarit ligjor, i cili gjithashtu duhet të ketë dokument identifikimi.

Personat e identifikuar më parë si problematikë nga strukturat e rendit nuk do të lejohen të hyjnë në ambientet e stadiumit.

Policia u bën thirrje qytetarëve dhe drejtuesve të automjeteve të shmangin lëvizjen në akset e lartpërmendura gjatë orarit të pasdites, si dhe kërkon bashkëpunimin e tifozerive për zbatimin e rregullave të sigurisë.