Zhduket kasaforta me 600 mijë lekë nga një dyqan në Kavajë, policia shkon në banesën e të dyshuarit dhe zbulon të papriturën

Një vjedhje e ndodhur gjatë natës në një dyqan rrobash në Kavajë është zbardhur nga policia, duke çuar në arrestimin e një personi dhe shpalljen në kërkim të bashkëpunëtorit të tij të dyshuar.

Ngjarja është denoncuar më 8 tetor 2026 nga menaxherja e një dyqani rrobash në lagjen nr. 3 të qytetit, e cila ka konstatuar se gjatë natës ishte vjedhur kasaforta me rreth 600 mijë lekë, si dhe gjashtë aparate celularë.

Menjëherë pas kallëzimit, policia e Kavajës nisi hetimet për identifikimin dhe kapjen e personave të përfshirë në vjedhje.

Si rezultat i veprimeve hetimore, është arrestuar M. L., 46 vjeç, banues në Kavajë, i dyshuar si një nga autorët e ngjarjes.

Gjatë kontrollit të banesës së tij, efektivët kanë gjetur dhe sekuestruar kasafortën e vjedhur, brenda së cilës ndodhej ende një sasi parash. Policia nuk ka saktësuar shumën e rikuperuar.

Ndërkohë, hetimet kanë çuar edhe në identifikimin e një bashkëpunëtori të dyshuar, A. S., 30 vjeç, gjithashtu banues në Kavajë, i cili është shpallur në kërkim.

Policia vijon punën për lokalizimin dhe kapjen e tij, ndërsa materialet procedurale i janë referuar Prokurorisë së Durrësit për veprën penale “Vjedhja”.