MADRID, 11 Tetor 2026 — Ylli i Real Madridit, Vinicius Junior, rrezikon të humbasë sfidën e madhe kundër Barcelonës më 25 tetor, pas përjashtimit me karton të kuq gjatë fitores 1-0 ndaj Villarrealit në “Santiago Bernabéu”. Raporti zyrtar i arbitrit Díaz de Mera ka zbardhur arsyet e përjashtimit dhe sjelljen e sulmuesit brazilian, çka mund të sjellë një dënim të rëndë disiplinor.

Sipas raportit të gjyqtarit, Vinicius u përjashtua në minutën e 73-të pasi tërhoqi flokët e një lojtari kundërshtar në një moment kur topi nuk ishte në lojë, aksion ky që solli edhe anulimin e golit të shënuar prej tij. Pas marrjes së kartonit të kuq, braziliani shfaqi një “qëndrim agresiv” ndaj arbitrit kryesor dhe u desh ndërhyrja e shokëve të skuadrës për ta larguar nga fusha e lojës.

Nëse Komisioni Disiplinor i Federatës Spanjolle e klasifikon veprimin e tij si sjellje të dhunshme jashtë duelit për topin, Vinicius mund të dënohet me të paktën dy ndeshje pezullim. Një masë e tillë do ta nxirrte sulmuesin jashtë fushës për përballjet e ardhshme kundër Sevillas dhe në “El Clásico” përballë Barcelonës. Sfida u shoqërua me tensione edhe në stafa, ku u ndëshkuan me kartonë trajnerë e pjesëtarë të të dyja klubeve, përfshirë përjashtimin e trajnerit të portierëve të Realit, Nuno Santos.