Dy avionë janë përplasur në ajër të shtunën në zonën e Sassuolos, në provincën e Modenës, në veri të Italisë.

Si pasojë e aksidentit, njëri prej pilotëve ka mbetur i plagosur, raporton noa.al duke cituar agjencinë e lajmeve ANSA.

Ngjarja ndodhi në një fushë aviacioni të dedikuar për avionët e lehtë. Pas përplasjes, njëri prej avionëve arriti të kryente një ulje emergjente, ndërsa avioni tjetër u rrëzua në tokë.

Piloti që realizoi uljen emergjente nuk pësoi lëndime, ndërsa drejtuesi i avionit që u rrëzua mbeti i plagosur dhe u transportua në spital për të marrë ndihmën mjekësore.

Në vendngjarje mbërritën ekipet e zjarrfikësve dhe një helikopter i urgjencës mjekësore për të ndërhyrë pas aksidentit.

Autoritetet italiane kanë nisur hetimet për të përcaktuar shkaqet dhe rrethanat e përplasjes në ajër.