Shqiptari u godit me thikë në Itali, zbulohet kërkesa që dyshohet se iu bë para sulmit, arrestohet i dyshuari

Një person është arrestuar nga karabinierët italianë, i dyshuar si autor i plagosjes me thikë të një shtetasi shqiptar 33 vjeçar në qytetin Roseto degli Abruzzi, në provincën e Teramos.

Ngjarja kishte ndodhur më 15 shtator, në zonën Campo a Mare, ndërsa zhvillimet e reja të hetimit janë bërë publike sot.

Sipas medias italiane, hetimet kanë zbuluar se pas sulmit dyshohet se fshihej një tentativë grabitjeje.

Nga rindërtimi i ngjarjes rezulton se autori i dyshuar kishte kërcënuar shtetasin shqiptar, duke i kërkuar t’i dorëzonte një shumë prej 300 eurosh.

Pas refuzimit të shqiptarit për t’i dhënë paratë, situata dyshohet se është përshkallëzuar, duke përfunduar me përdorimin e një thike.

Hetuesit italianë kanë mbledhur prova dhe indicie që kanë çuar në identifikimin e personit të dyshuar për sulmin, një emigrant nga Afrika e Jugut.

Karabinierët e Giulianovas kanë ekzekutuar ndaj tij një urdhër arresti të lëshuar nga gjykata, me kërkesë të Prokurorisë së Teramos.

Personi i arrestuar, një shtetas i huaj banues në Roseto, dyshohet për plagosje të rënduar dhe tentativë grabitjeje.

Pas arrestimit, ai është dërguar në burgun e Teramos, ku do të qëndrojë në dispozicion të autoriteteve gjyqësore. /noa.al