Shqiptari mbyllet brenda makinës kur shikon karabinierët, ajo që bëri për t’i shpëtuar kontrollit e çoi në spital

Një shtetas shqiptar është arrestuar nga karabinierët italianë në Capriolo, në provincën e Brescias, pas një operacioni kundër shpërndarjes së lëndëve narkotike.

Ngjarja ka marrë një kthesë të papritur në momentin kur 43-vjeçari ka vënë re praninë e forcave të rendit dhe është mbyllur brenda automjetit të tij, duke gëlltitur disa doza lënde narkotike.

Sipas mediave italiane, karabinierët e kishin vëzhguar shqiptarin teksa dilte nga makina dhe i afrohej një automjeti tjetër, ku dyshohet se kishte dorëzuar një dozë kokaine.

Efektivët ndërhynë menjëherë, duke identifikuar blerësin dhe sekuestruar lëndën narkotike.

Ndërkohë, shqiptari u mbyll në makinën e tij dhe dyshohet se gëlltiti disa doza për të shmangur sekuestrimin e tyre.

Pas hapjes së automjetit, ai kundërshtoi ndërhyrjen e karabinierëve, por përfundimisht u arrestua për shpërndarje të lëndëve narkotike dhe rezistencë ndaj zyrtarëve publikë.

Për shkak të rrezikut nga gëlltitja e drogës, 43-vjeçari u dërgua në spitalin civil të Brescias për ekzaminime mjekësore.

Më 9 tetor, gjykata konfirmoi arrestimin dhe vendosi ndalimin e qëndrimit të tij në provincën e Brescias.

Autoritetet italiane nxorën gjithashtu urdhrin e dëbimit dhe e transferuan shqiptarin në qendrën e riatdhesimit në Milano, në pritje të ekzekutimit të vendimit.