LONDËR, 10 Tetor 2026 — Gjyqësori i Anglisë dhe Uellsit ka hartuar një kuadër të ri zyrtar rregullator për përdorimin e teknologjisë së Inteligjencës Artificiale në sistemin e drejtësisë. Sipas udhëzimeve të reja, AI mund të shërbejë vetëm si një mjet ndihmës për proceset teknike, ndërsa vendimmarrja, vlerësimi i provave dhe arsyetimi ligjor mbeten përgjegjësi ekskluzive e njerëzve.

Udhëzuesi i publikuar në faqen zyrtare të autoriteteve gjyqësore përcakton se çdo produkt apo material i gjeneruar nga sistemet e inteligjencës artificiale duhet të kalojë përmes një kontrolli të rreptë dhe verifikimi nga gjyqtari i çështjes. Dokumenti nërmvizon se përgjegjësia përfundimtare për çdo akt apo vendim ligjor do të bjerë drejtpërdrejt mbi zyrtarin gjyqësor.

Deri më tani, testet e kryera në sistemin gjyqësor britanik janë fokusuar në procese me rrezikshmëri të ulët, si përmbledhja e dokumenteve të gjata, transkriptimi, anonimizimi i të dhënave sensitive dhe strukturimi i kronologjive të dosjeve. Për të garantuar sigurinë e informacionit, do të lejohen vetëm programe të miratuara që ruajnë të dhënat brenda Mbretërisë së Bashkuar, me mbrojtje të lartë kibernetike dhe pa qasje të hapur në rrjetin e internetit.

Zbatimi i çdo mjeti të ri teknologjik në gjyqësor do të monitorohet nga një grup i posaçëm drejtues, i udhëhequr nga gjyqtari përgjegjës për Inteligjencën Artificiale. Ky organ do të vlerësojë standardet etike, ligjore dhe mbrojtjen e të dhënave përpara se çdo aplikacion i ri të vendoset në përdorim të gjerë.