GJILAN, 10 Tetor 2026 — Prokuroria Themelore në Gjilan ka dhënë detaje të reja për vrasjen e dyfishtë të ndodhur më 9 tetor në fshatin Livoç i Poshtëm, ku humbën jetën një 27-vjeçare dhe vëllai i saj 31-vjeçar, ndërsa një person tjetër mbeti i plagosur.

Sipas njoftimit zyrtar, ngjarja ndodhi rreth orës 14:30. I dyshuari, V.R., nga Gjilani, dyshohet se për motive ende të panjohura qëlloi me armë zjarri bashkëshorten e tij, N.B., 27 vjeçe, dhe vëllain e saj, E.B., 31 vjeç, duke u shkaktuar vdekjen.

Ndërkohë, M.B., 48 vjeç, djali i xhaxhait të bashkëshortes së të dyshuarit, mbeti i plagosur dhe po merr trajtim mjekësor në Qendrën Klinike Universitare të Kosovës. Pas ngjarjes, në vendin e krimit mbërritën ekipet përkatëse të Policisë së Kosovës dhe Prokurori i Shtetit, të cilët ndërmorën veprimet e para hetimore për zbardhjen e rrethanave.

Gjatë hetimeve, autoritetet sekuestruan një pistoletë të markës “Beretta” me leje të skaduar, e cila dyshohet se është përdorur në kryerjen e veprës penale. Gjithashtu, janë kryer kontrolle në tri lokacione që lidhen me pronat e të dyshuarit, ku janë sekuestruar prova të tjera materiale.

Prokuroria bëri të ditur se i dyshuari nuk ka të kaluar kriminale dhe se ndaj tij nuk janë raportuar më parë raste të dhunës në familje.

Ai dyshohet për veprat penale “Vrasja e rëndë” dhe “Mbajtja në pronësi, kontroll ose posedim i paautorizuar i armëve”, të parashikuara nga Kodi Penal i Republikës së Kosovës. Prokuroria Themelore në Gjilan, në koordinim me Policinë e Kosovës, do të vijojë hetimet për të zbardhur plotësisht rrethanat dhe motivet e ngjarjes.