ENSENADA, 10 Tetor 2026 — Një gjykatë në Meksikë ka shpallur fajtorë tre burra meksikanë për vrasjen e dy vëllezërve australianë dhe mikut të tyre amerikan, të cilët u sulmuan në prill të vitit 2024 ndërsa po bënin kamping në një plazh të izoluar, në një ngjarje që shkaktoi zemërim të madh dhe reagime ndërkombëtare.

Vendimi u shpall në qytetin e Ensenadës, në shtetin e Baja California, ku trupi gjykues theksoi se të pandehurit i kishin kryer vrasjet me paramendim, ndërsa vendimi përfundimtar për masën e dënimit do të jepet më 16 tetor.

Viktimat ishin vëllezërit Jake dhe Callum Robinson, përkatësisht 30 dhe 33 vjeç, si dhe miku i tyre Carter Rhoad, 30 vjeç, të cilët u zhdukën gjatë udhëtimit të tyre dhe u gjetën disa ditë më pas të pajetë, me plagë plumbash në kokë.

Sipas dosjes hetimore, tre turistët u sulmuan në befasi dhe u vranë pa mundur të bënin rezistencë, ndërsa njëri prej autorëve ishte mburrur më pas për vjedhjen e sendeve të tyre personale, duke pretenduar se njëri prej të rinjve i ishte lutur për jetën pasi ishte fejuar rishtazi.

Prokuroria ka kërkuar dënimin e secilit prej autorëve me 210 vite burg, megjithëse ligji në këtë shtet parashikon një dënim maksimal prej 60 vitesh, ndërsa më parë është dënuar edhe e dashura e të dyshuarit kryesor me 20 vite burg për përfshirje në vjedhje.

Familjarët e viktimave kanë përshkruar dhimbjen e tyre dhe mënyrën çnjerëzore të trajtimit të djemve, duke e cilësuar vendimin e gjykatës si një hap të rëndësishëm drejt drejtësisë, në një zonë e cila përballet vazhdimisht me dhunën e grupeve kriminale dhe karteleve të drogës.