GREQI, 9 tetor 2026 – Një shpërthim i fuqishëm në ambientet e rafinerisë “Motor Oil”, në Agioi Theodoroi të Greqisë, i ka marrë jetën një shtetasi shqiptar dhe ka lënë të plagosur rëndë një tjetër.

Viktima është identifikuar si Robert Cakaj, 43 vjeç, ndërsa i plagosuri është Dorian Hysa, 50 vjeç, i cili vijon të marrë trajtim mjekësor në gjendje të rëndë.

Sipas raportimeve të mediave greke, shpërthimi ndodhi pak pas orës 11:00 të së premtes, gjatë punimeve të mirëmbajtjes parandaluese në ambientet e rafinerisë. Ngjarja shkaktoi plagosjen e disa punëtorëve, ndërsa dy prej tyre u raportuan fillimisht në gjendje të rëndë.

Të plagosurit u transportuan fillimisht në Spitalin e Korinthit, ku morën ndihmën e parë mjekësore, dhe më pas u dërguan në spitalin Thriasio për trajtim të specializuar.

Pavarësisht përpjekjeve të mjekëve, 43-vjeçari Robert Cakaj nuk arriti t’u mbijetonte plagëve të marra nga shpërthimi. Ndërkohë, 50-vjeçari Dorian Hysa vijon të trajtohet i intubuar.

Rrethanat e plota të shpërthimit dhe shkaqet që çuan në këtë ngjarje mbeten për t’u sqaruar nga autoritetet përkatëse.