Tiranë, 9 tetor 2026 – Kryeministri Edi Rama ka njoftuar se javën e ardhshme pritet të krijohet Ministria e Administratës Publike, një institucion i ri që, sipas tij, do të ketë një rol të rëndësishëm në forcimin e administratës shtetërore dhe në procesin e integrimit europian të Shqipërisë.

Gjatë fjalës së tij, Rama theksoi se administrata publike është kthyer në një nga prioritetet kryesore të qeverisë dhe se krijimi i ministrisë së re synon zgjerimin e përgjegjësive, detyrave dhe objektivave për modernizimin e shtetit shqiptar.

Kreu i qeverisë la të kuptohet se drejtimi i institucionit të ri do t’i besohet Adea Pirdenit, aktualisht ministre e Shtetit për Administratën Publike.

“Do të krijojmë javën e ardhshme Ministrinë e Administratës Publike, pikërisht sepse tanimë tema e administratës publike është një temë shumë qendrore e punës së qeverisë, por është një temë shumë qendrore edhe e shtetbërjes së mëtejshme europiane të Shqipërisë”, u shpreh Rama.

Ai argumentoi se ngritja e këtij institucioni do të mundësojë zgjerimin e fushës së përgjegjësive dhe rritjen e ambicieve për përmirësimin e funksionimit të administratës shtetërore.

“Është nevoja që, përmes Ministrisë së Administratës Publike, një model që e kanë shumë vende të tjera europiane, ne të zgjerojmë gamën e detyrave, gamën e punëve dhe, patjetër, edhe gamën e ambicieve për të ngritur më lart shtetin europian të shqiptarëve”, deklaroi kryeministri.

Rama shtoi se, sipas tij, drejtimi i ministrisë së re duhet t’i besohet ministres përgjegjëse për administratën publike.

Krijimi i ministrisë pritet të konkretizohet javën e ardhshme, ndërsa detajet për organizimin dhe funksionimin e saj mbeten për t’u bërë të ditura zyrtarisht.