LUSHNJË — Një aksident i rëndë rrugor është regjistruar në bypass-in e autostradës në Lushnjë, pranë rrethrrotullimit të Plukut, ku një automjet tip “Ford” ka dalë nga rruga dhe është përplasur me murin e një biznesi privat.

Si pasojë e goditjes së fortë, automjeti ka rrëzuar një shtyllë ndriçimi dhe pas disa rrotullimeve ka përfunduar i përmbysur në anë të rrugës. Drejtuesi i mjetit është transportuar me urgjencë nga shërbimi i ambulancës drejt Spitalit të Lushnjës, ku po merr ndihmën e nevojshme mjekësore.

Në vendngjarje kanë mbërritur shërbimet e Policisë Rrugore dhe policia shkencore për rregullimin e qarkullimit dhe kryerjen e ekspertizës teknike. Nga të dhënat e para hetimore dyshohet se shkak i aksidentit ka qenë lëvizja me shpejtësi mbi normat e lejuara, gjë që ka sjellë humbjen e kontrollit të mjetit nga drejtuesi.