LEZHË — Detaje të reja janë zbardhur lidhur me operacionin e koduar “Detajet”, ku Policia e Shtetit parandaloi një vrasje të planifikuar në aksin e vjetër “Pllanë-Lezhë”.

Të arrestuarit nga forcat e rendit janë shtetasit Elden Tarja (25 vjeç, banues në Barbullush), Kristian Ymeri/Shkambi (34 vjeç, banues në Kamëz) si dhe Vinçesk Piroli (38 vjeç, banues në Kurbin, person me precedentë të shumtë penalë kundër personit brenda dhe jashtë vendit).

Sipas të dhënave të reja hetimore, blutë kanë dyshime të forta se të arrestuarit mund të jenë të përfshirë edhe si autorë të atentatit të regjistruar më parë në Sarandë. Në kuadër të verifikimeve dhe lidhjeve kriminale të këtij grupi, strukturat e policisë po ushtrojnë kontrolle të imtësishme në disa qytete, përfshirë Shkodrën, Laçin dhe Kamzën.

Gjatë ndalimit të tyre në aksin “Gjadër-Barbullush”, policia sekuestroi tri pistoleta me krehra e municion luftarak, automjetin tip “Volkswagen” të përdorur për largim, si dhe motomjetin e vjedhur në Suedi me të cilin dy prej të dyshuarve lëviznin të armatosur e me skafandra. Materialet procedurale i janë kaluar Prokurorisë për veprime të mëtejshme.

Njoftimi i policisë:

Lezhë/Puna e mirëorganizuar dhe e shpejtë policore parandalon një vrasje

Finalizohet operacioni i koduar “Detajet”.

Vihen në pranga 3 shtetas, të cilët, në mënyrë të organizuar dhe në bashkëpunim me njëri-tjetrin, kishin planifikuar të kryenin vrasjen.

2 prej tyre, të armatosur dhe me skafandra, lëviznin me një motomjet të vjedhur në Suedi, në rrugën e vjetër “Pllanë-Lezhë”, për të kryer krimin.

Shtetasi tjetër, bashkëpunonte me ta, duke i ndihmuar që të largoheshin me automjet nga zona ku kishin planifikuar të kryenin vrasjen.

Sekuestrohen 3 armë zjarri (pistoleta), si dhe automjeti dhe motomjeti i përdorur në këtë rast.

Si rezultat i punës së mirëorganizuar operacionale të specialistëve të Sektorit për Hetimin e Krimeve të Rënda dhe shërbimeve të Drejtorisë Vendore të Policisë Lezhë, në bashkëpunim me shërbimet e Drejtorisë Vendore të Policisë Shkodër, në kuadër të intensifikimit të punës operative dhe kontrolleve, me objektiv madhor parandalimin e ngjarjeve kriminale, u finalizua operacioni i koduar “Detajet”.

Gjatë këtij operacioni u arrestuan shtetasit E. T., 25 vjeç, banues në fshatin Barbullush, K. Y. (Sh.), 34 vjeç, banues në Kamzë, dhe V. P., 38 vjeç, banues në Kurbin (shtetas me precedentë të shumtë penalë për krime kundër personit, brenda dhe jashtë shtetit).

Menjëherë pas marrjes së informacionit se në rrugën e vjetër “Pllanë-Lezhë” dy shtetas me skafandra, të cilët lëviznin me motomjet, kryenin lëvizje të dyshimta, shërbimet e Policisë organizuan punën dhe shkuan në zonën e sinjalizuar.

Si rezultat i patrullimeve komplekse dhe krehjes së zonave ku dyshohej se kishte lëvizur motomjeti, në Lezhë dhe në drejtim të Shkodrës, në segmentin rrugor “Gjadër-Barbullush”, u ndalua automjeti tip “Volkswagen”, me të cilin po lëviznin shtetasit V. P. dhe K. Y. (Sh.), të konstatuar më parë duke lëvizur me motomjet në rrugën e vjetër “Pllanë-Lezhë”. Këta shtetas shoqëroheshin në automjet nga bashkëpunëtori i tyre, shtetasi E.T., drejtuesi i automjetit, me qëllim largimin nga zona ku kishin planifikuar vrasjen.

Gjatë kontrollit fizik, të motomjetit dhe në banesën e shtetasit E. T. dhe përreth saj, u gjetën 3 armë zjarri (pistoleta), me krehra dhe fishekë, municion luftarak, motomjeti i dyshuar i përdorur për rastin, çelësat e të cilit iu gjetën shtetasit 34-vjeçar.

Nga verifikimet rezultoi se motomjeti ishte i vjedhur në Suedi.

Materialet procedurale iu referuan Prokurorisë, për veprime të mëtejshme.