TIRANË — Hetimet e kryera nga njësitë e specializuara të hetimit kibernetik dhe Prokuroria kanë arritur të lokalizojnë burimin e dërgimit të valës së e-mail-eve kërcënuese me alarme për bomba, të cilat u dërguan mëngjesin e kësaj të premteje në rreth 150 institucione publike e shtetërore në Shqipëri.

Sipas të dhënave hetimore, serveri nga ku janë nisur mesazhet i përket “Unitropico” (Universiteti Ndërkombëtar i Tropikut Amerikan), një institucion publik arsimor me seli në qytetin Yopal të Kolumbisë. Ekspertët e krimit kibernetik dyshojnë se adresa elektronike ose sistemi i përdorur nga ky universitet është hakeruar nga autorët me qëllim fshehjen e gjurmëve dhe shkaktimin e panikut.

Në mesazhet kërcënuese, dërguesi paraqitej si “udhëheqës i milicisë serbe” dhe pretendonte se kishte vendosur mjete shpërthuese në godinat zyrtare duke kushtëzuar sulmet me çështjen e Kosovës. Kontrollet e imtësishme të Policisë së Shtetit në të gjitha ambientet e prekuara rezultuan negative për prani lëndësh shpërthyese, ndërsa puna hetimore vijon në nivel ndërkombëtar për identifikimin e personave përgjegjës pas këtij sulmi kibernetik.