STRASBURG — Një skulpturë provokuese e realizuar nga artisti danez Jens Galschiøt, e cila parodizon Presidentin e Shteteve të Bashkuara Donald Trump, është vendosur për ekspozim në ambientet e Parlamentit Evropian në Strasburg.

Vepra e titulluar “Orange Plague” (Murtaja e Portokalltë) ose “Mbreti i padrejtësisë”, me lartësi rreth 2.5 metra e mbuluar me ar 23-karatësh, paraqet figurën e Trumpit të zhveshur, duke mbajtur një shkop të artë ndërsa qëndron mbi shpinën e një njeriu që po fundoset. Përmes mesazhit shoqërues të ekspozitës, artisti synon të kritikojë politikat e liderit amerikan lidhur me çështjet e ndryshimeve klimatike dhe qasjen e tij ndaj problemeve globale.

Iniciativa për vendosjen e statujës në pikën lidhëse mes dy godinave kryesore të parlamentit u ndërmor nga eurodeputeti danez i krahut të majtë, Per Clausen, ndërsa vepra do të qëndrojë e ekspozuar deri të enjten. Deri më tani nuk ka pasur ndonjë reagim publik nga Uashingtoni zyrtar ose nga vetë Presidenti Trump.