TIRANË — Arrestimi i Valentin Ftonit në Shtetet e Bashkuara të Amerikës i ka dhënë fund arratisjes me dekada të një prej personave më të kërkuar nga drejtësia shqiptare, i dënuar për tri vrasje të kryera në fund të viteve ’90 dhe fillimin e viteve 2000.

Ftoni, i cili ishte pjesë e listës me 30 personat më të kërkuar në Shqipëri, ka marrë dy dënime të veçanta me nga 25 vite burgim secili. Vendimi i parë lidhet me vrasjen e shtetasit Tom Gaci në vitin 1998, ndërsa dënimi i dytë përfshin ekzekutimin e çiftit Gjelosh dhe Ardiana Markaj në vitin 2000. Ai gjithashtu u gjykua edhe për vrasjen e Behar Becit në vitin 2001, ngjarje për të cilën gjykata e shpalli atë të pafajshëm.

Për t’i shpëtuar zbatimit të vendimeve gjyqësore, i kërkuari ka jetuar me identitete të ndryshme në SHBA për më shumë se dy dekada. Lokalizimi dhe vënia e tij në pranga u realizuan falë një operacioni të përbashkët mes Policisë së Shtetit, Shërbimit të Marshallëve Amerikanë (US Marshals) dhe Ambasadës së SHBA-së në Tiranë, ndërsa pritet nisja e procedurave të ekstradimit drejt Shqipërisë.