TIRANË — Një seri e-mail-esh me përmbajtje ekstremisht kërcënuese u është dërguar mëngjesin e kësaj të premteje rreth 150 adresave elektronike të disa institucioneve publike e shtetërore në Shqipëri, duke ngritur alarmin te autoritetet e sigurisë.

Në mesazhet e dërguara, dërguesi prezantohet si "udhëheqësi i milicisë serbe" dhe pretendon se ka vendosur mjete shpërthuese brenda ndërtesave zyrtare, duke paralajmëruar shpërthimin e tyre brenda një ore. E-mail-i përmban gjuhë të fortë urrejtjeje dhe kërcënime të drejtpërdrejta për jetën e shqiptarëve, ndërsa kushtëzon ndërprerjen e sulmeve të pretenduara me njohjen e Kosovës si territor të Serbisë.

Sipas procedurave standarde të sigurisë, strukturat e Policisë së Shtetit dhe njësitë e Anti-Terrorit kanë nisur menjëherë verifikimet në terren në godinat e prekura, ndërsa sektori i krimit kibernetik po punon për gjurmimin e adresës IP dhe origjinës nga ku janë nisur mesazhet kërcënuese.