TIRANË — Edhe në marrëdhëniet më të shëndetshme e të konsoliduara, komunikimi i përditshëm mund të shndërrohet në një burim të padukshëm tensioni. Ekspertët e marrëdhënieve në çift vënë në dukje se shumë burra, ndonëse ushqejnë ndjenja të sinqerta dashurie për bashkëshortet e tyre, përdorin shpesh disa shprehje automatike që pa dashje zhvlerësojnë emocionet e partneres dhe krijojnë distancë emocionale.

Sipas një analize mbi dinamikat e komunikimit në çift, janë identifikuar 6 fraza kryesore që priren të lëndojnë gra dhe mënyra se si ato mund të zëvendësohen me një qasje më empatike:

“Nuk e kuptoj pse po e bën kaq të madhe” — Kjo frazë priret të përjohet si zhvlerësim i emocioneve. Ekspertët sugjerojnë zëvendësimin e saj me një demonstrim empatie: “E shoh që je e mërzitur. Të dua dhe dua të kuptoj më mirë pse kjo gjë të shqetëson kaq shumë.”

“Nuk kam kohë për këtë tani” — Shmangia e menjëhershme e bisedës shkakton ndjesinë e braktisjes. Zgjidhja më e mirë është përcaktimi i një momenti të dytë: “Tani nuk jam në gjendjen e duhur për këtë bisedë. A mund të flasim pas një ore?”

“Nuk mendova se duhej të ta tregoja” — Mospërfshirja në vendime apo informacione që prekin të dy partnerët cenon besimin. Komunikimi i hapur mbetet i domosdoshëm për çështjet me interes të përbashkët.

“Duhet të ndalosh së menduari kaq shumë” — Përpjekja për të fshirë ankthin me fjali eprore zakonisht e shton atë. Në vend të kësaj, rekomandohet mbështetje praktike dhe prani emocionale.

“Do të merrem me të më vonë” — Përsëritja e kësaj përgjigjeje rrit barren mendore te partnerja. Përcaktimi i një afati konkret kohor (p.sh. “do të merrem me këtë pas 30 minutash”) mënjanon frustrimin.

“Jam i sigurt që do t’ia dalësh vetë” — Edhe pse mund të thuhet si inkurajim, shpesh tingëllon si distancim nga responsabiliteti. Fraza zëvendësuese duhet të rikonfirmojë partneritetin: “Po të dëgjoj dhe dua ta dish se nuk je vetëm. Do ta kalojmë bashkë.”

Ndryshimi i këtyre zakonave të vogla në të folur shihet si një hap kyç për ruajtjen e harmonisë dhe forcimin e lidhjes emocionale në familje.