Shqipëria ka avancuar në procesin e negociatave për anëtarësimin në Bashkimin Evropian, pasi është arritur dakordësi në nivelin e COELA-s për mbylljen e përkohshme të Kapitullit 20, që lidhet me sipërmarrjen dhe politikën industriale.

Çështja pritet të shqyrtohet nga COREPER, Komiteti i Përfaqësuesve të Përhershëm të vendeve anëtare të BE-së. Nëse qëndrimi i përbashkët miratohet, hapi i radhës do të jetë përgatitja e Konferencës Ndërqeveritare BE-Shqipëri, ku do të formalizohet mbyllja e përkohshme e kapitullit.

Kapitulli 20 përfshin fusha që lidhen me politikën industriale, zhvillimin e sipërmarrjes, klimën e biznesit dhe mbështetjen për ndërmarrjet e vogla dhe të mesme.

Ende nuk ka një datë zyrtare për mbajtjen e Konferencës Ndërqeveritare. Data 13 tetor është përmendur si një nga mundësitë, pas mbledhjes së Këshillit të Çështjeve të Përgjithshme të BE-së.

Vendimi përfundimtar pritet pas shqyrtimit në COREPER. Nëse procedura përmbyllet me sukses, Kapitulli 20 do të bëhet kapitulli i katërt i mbyllur përkohësisht nga Shqipëria në kuadër të negociatave për anëtarësim në Bashkimin Evropian.