Një rast i rrallë i lindjes është regjistruar në provincën e Salernos në Itali, ku një grua 59-vjeçare dhe një burrë 70-vjeçar janë bërë prindër të një vajze, të pagëzuar Francesca Pia.

Vajza ka lindur në një strukturë shëndetësore në zonën e Salernos, pas një shtatzënie të ndjekur nga ekipi mjekësor i gjinekologut Mario Polichetti, i specializuar në trajtimet e riprodhimit të asistuar.

Sipas mjekut, foshnja ka lindur në gjendje të mirë shëndetësore, me peshë 2.4 kilogramë. Aktualisht ajo peshon rreth 4.5 kilogramë dhe, sipas vlerësimit të ekipit mjekësor, po zhvillohet normalisht.

“Jemi përballë një rasti vërtet të jashtëzakonshëm, sepse arritja e një konceptimi në moshën 59-vjeçare përbën një ngjarje jashtëzakonisht të rrallë”, deklaroi Polichetti.

Ai theksoi se gjendja shëndetësore e foshnjës është aspekti kryesor i këtij rasti.

“Francesca Pia është në gjendje shumë të mirë shëndetësore dhe kjo është natyrisht ajo që na jep kënaqësinë më të madhe”, u shpreh gjinekologu.

Sipas tij, një shtatzëni në mosha të tilla kërkon monitorim dhe kujdes të veçantë gjatë gjithë procesit.

“Kur përballesh me rrugëtime kaq komplekse, çdo hap kërkon vëmendje dhe përgjegjësi të madhe”, tha Polichetti.

Mjeku e cilësoi moshën e prindërve si një prej elementeve që e bën rastin veçanërisht të pazakontë, duke vënë në dukje se lindjet pas konceptimit në këto mosha janë shumë të rralla.

Polichetti e konsideroi lindjen e Francesca Pia një rast me interes edhe përtej Italisë, ndërsa theksoi se fakti që foshnja gëzon shëndet të mirë e bën përfundimin e këtij procesi veçanërisht pozitiv për ekipin mjekësor.