Dy ngjarje të rënda kanë tronditur fshatin Boriç i Madh në Malësinë e Madhe, ku brenda dy ditësh janë gjetur pa shenja jete një 28-vjeçar dhe një 19-vjeçare.

Sipas Policisë, në të dyja rastet dyshohet paraprakisht për vetëvrasje. Ngjarja e parë është regjistruar më 6 tetor, rreth orës 15:20, kur 28-vjeçari me inicialet K.P., banues në Boriç i Madh, u gjet i pajetë në një zonë bujqësore të fshatit.

Një ditë më vonë, më 7 tetor, në të njëjtin fshat u gjet e pajetë 19-vjeçarja me inicialet D.Gj. Edhe për këtë rast, autoritetet dyshojnë paraprakisht për vetëvrasje.

Për të dyja ngjarjet janë nisur hetimet, ndërsa grupet hetimore po punojnë për zbardhjen e plotë të rrethanave dhe shkaqeve që çuan në humbjen e dy jetëve.

Ndërkohë, banorë të zonës kanë ngritur dyshime për një lidhje të mundshme mes dy rasteve. Sipas pretendimeve të tyre, të cilat nuk janë konfirmuar nga autoritetet, 28-vjeçari dhe 19-vjeçarja mund të kenë qenë në një lidhje.

Banorët kanë hedhur gjithashtu pretendimin se e reja mund të ishte fejuar nga familjarët kundër dëshirës së saj dhe se kjo ngjarje mund të ketë ndodhur në të njëjtën ditë kur 28-vjeçari u gjet i pajetë.

Deri tani, Policia nuk ka konfirmuar një lidhje mes dy rasteve dhe as pretendimet lidhur me një fejesë të padëshiruar.

Hetimet vijojnë për të përcaktuar rrethanat e sakta të dy ngjarjeve dhe për të verifikuar nëse mes tyre ekziston ndonjë lidhje.