Deputeti i Partisë Socialiste, Erion Braçe, ka deklaruar se për të kjo është një nga ditët më të vështira në karrierën e tij politike, teksa Kuvendi po diskuton reformën e re territoriale.

Në një lidhje live për emisionin “Now” në Euronews Albania, nga ambientet e jashtme të Kuvendit, Braçe tha se ndodhet përballë një zgjedhjeje të rëndësishme: të vijojë të luftojë brenda politikës ose të largohet.

“Jo se nuk e kam ndarë ende mendjen, por sot, Erla, dhe besoj se edhe ti e di, që është dita më e vështirë e 30 viteve të mia. Se duhet të zgjedh, po them sepse duhet të zgjedh, të vijoj të luftoj apo të iki”, u shpreh Braçe.

Deputeti socialist theksoi se Partia Socialiste mbetet partia e tij, duke bërë dallim mes subjektit politik dhe individëve që aktualisht janë pjesë e tij.

“PS është partia ime dhe jo e atyre që më kanë gjetur në Parti”, tha Braçe.

Deklarata e tij vjen në një moment kur në Kuvend po zhvillohet debati për reformën territoriale dhe ndërsa brenda Partisë Socialiste janë shfaqur qëndrime të ndryshme lidhur me hartën e re administrative.

Braçe nuk specifikoi nëse do të largohet nga politika, por e paraqiti vendimin si një zgjedhje personale që lidhet me mënyrën se si do të vijojë të angazhohet politikisht.