Fondacioni Çamëria “Hasan Tahsini” ka reaguar ndaj ekspozimit të portretit të Napoleon Zervës në Dervician, duke e cilësuar këtë veprim si “provokim të rëndë ndaj shqiptarëve”.

Në reagimin e tij, fondacioni i ka kërkuar Bashkisë Dropull që të heqë portretin dhe të japë një shpjegim publik për vendosjen e tij. Gjithashtu, i ka bërë thirrje qeverisë shqiptare që, përmes institucioneve kompetente, të hetojë rrethanat e këtij veprimi dhe të identifikojë personat përgjegjës.

“Provokim i rëndë ndaj shqiptarëve në Dervician. I bëjmë thirrje kryetarit të Bashkisë Dropull të heqë menjëherë portretin e Zervës nga ky ekspozim nderues dhe të japë një shpjegim publik për këtë zgjedhje të papranueshme”, thuhet në reagim.

Fondacioni kërkon gjithashtu që të hetohet se kush e ka propozuar, miratuar dhe mundësuar ekspozimin, duke kërkuar që të përcaktohen përgjegjësitë institucionale dhe ligjore.

Në reagim theksohet se respektimi i minoritetit grek dhe i të drejtave të tij është i padiskutueshëm, ndërsa përgjegjësia për ekspozimin, sipas fondacionit, duhet të lidhet me personat konkretë që kanë marrë vendimin.

“Ky provokim nuk mund të kalojë në heshtje. Viktimat e gjenocidit kërkojnë drejtësi dhe respekt, ndaj autoritetet shqiptare kanë detyrimin të japin përgjigje dhe të veprojnë”, përfundon reagimi i Fondacionit Çamëria “Hasan Tahsini”.