TIRANË — Drejtori i Hekurudhës Shqiptare, Ergys Verdho, si dhe drejtoresha e Korporatës Elektroenergjitike Shqiptare (KESH), Viola Haxhiademi, janë paraqitur mëngjesin e kësaj të enjteje në ambientet e Prokurorisë së Posaçme Kundër Korrupsionit dhe Krimit të Organizuar (SPAK).

Haxhiademi, e cila më parë ka mbajtur postin e Sekretares së Përgjithshme në Ministrinë e Infrastrukturës dhe Energjisë, si dhe Verdho u thirrën nga hetuesit në vijim të veprimeve hetimore që po kryhen mbi procedurat e tenderave publikë në sektorin e infrastrukturës dhe energjisë.

Ardhja e tyre në dyert e SPAK vjen vetëm një ditë pasi në prokurorinë e posaçme u pyetën edhe dy zyrtarë të tjerë të lidhur me të njëjtat dikastere, ish-kreu i Autoritetit Rrugor Shqiptar (ARRSH), Gentian Gjyli, dhe ish-drejtori i KESH-it, Erald Elezi.

Autoritetet hetimore nuk kanë dhënë ende detaje zyrtare mbi statusin ligjor apo çështjet specifike për të cilat janë thirrur drejtuesit e institucioneve, ndërsa procedurat e pyetjes në SPAK po vijojnë.