TIRANË — Kryeministri Edi Rama u ka drejtuar një paralajmërim të prerë deputetëve të Partisë Socialiste gjatë mbledhjes së grupit parlamentar të zhvilluar mëngjesin e sotëm, lidhur me votimin e reformës së re administrative-territoriale.

Gjatë takimit të mbyllur që u mbajt në sallën e seancave plenare pak përpara nisjes së punimeve të Kuvendit, Rama ka bërë të qartë se qëndrimi për hartën e re territoriale është një vendim kolektiv politik dhe do të trajtohet si i tillë. “Kush del nga vendimi i grupit, del nga grupi”, mësohet të ketë deklaruar kreu i qeverisë para deputetëve socialistë.

Nën trysninë e këtyre zhvillimeve, deputeti socialist Vullnet Sinaj ka ndryshuar zyrtarisht qëndrim duke votuar pro projektligjit gjatë mbledhjes së grupit, ndonëse në takimet e mëparshme kishte shprehur rezerva dhe kishte votuar kundër reduktimit të bashkive nga 61 në 46.

Mesazhi i prerë i kryeministrit synon garantimin e disiplinës partiake përpara votimit në seancë plenare, ku mazhorancës i nevojitet një shumicë e cilësuar prej 84 votash për miratimin e reformës.