TIRANË — Përshkallëzohet situata e sigurisë përpara parlamentit, ku katër deputetë të opozitës, Besart Xhaferri, Saimir Korreshi, Klevis Balliu dhe Bardh Spahia, kanë lënë sallën e seancave plenare për t’iu bashkuar protestuesve në rrugë.

Prania e deputetëve vjen në një moment mjaft të tensionuar, ndërsa turma e qytetarëve po kërkon me ngulm heqjen e gardhit metalik të vendosur nga forcat e rendit në Rrugën e Elbasanit për të mundësuar marshimin drejt godinës së Kuvendit.

Për të zmbrapsur protestuesit dhe për të shmangur çarjen e perimetrit të sigurisë, Policia e Shtetit ka përdorur përsëri gaz lotsjellës, ndërsa përplasjet mes turmave dhe efektivëve në terren vijojnë.