TIRANË — Policia e Shtetit ka aplikuar një strategji të re masash sigurie për protestën e paralajmëruar sot nga opozita para Kuvendit të Shqipërisë, ku pritet të diskutohet dhe votohet projektligji për reformën e re administrative-territoriale.

Ndryshe nga herët e kaluara, forcat e rendit nuk kanë bllokuar rrugën përballë godinës së Parlamentit, duke e lënë atë të lirë për qarkullimin e qytetarëve. Sidoqoftë, efektivë të shumtë janë dislokuar në pikabllokime strategjike përgjatë zonës nga Xhamia e Namazgjasë në Rrugën e Elbasanit e deri te Ministria e Brendshme.

Ndërkohë që opozita ka paralajmëruar reagim si jashtë ashtu edhe brenda sallës plenare kundër draftit të Partisë Socialiste, i cili parashikon uljen e numrit të bashkive nga 61 në 46, zhvillimet kanë marrë edhe përmasë ndërkombëtare. Kryetarët e bashkive të drejtuara nga opozita i kanë dërguar zyrtarisht një letër Komisionit Europian, ku kërkojnë ndërhyrjen e institucioneve të Bashkimit Europian për të parandaluar atë që e cilësojnë si miratim të njëanshëm të hartës së re territoriale.