Bashkia në Kavala të Greqisë njoftoi se ka vendosur të mbyllë pa afat të gjitha fushat e futbollit në zonë duke tërhequr lejet e dhëna për ushtrimin e kurseve dhe seancave stërvitore për fëmijët, raporton noa.al.

Vendimi vjen pak ditë pasi Asllan Gjana, djali 16 vjeçar shqiptar i njohur si "Ani" vdiq tragjikisht në fushën e futbollit në një incident të tmerrshëm që ndodhi në Thasos.

Futbollisti i ri humbi jetën pasi, gjatë një ndeshjeje, në përpjekje për të ndjekur topin doli jashtë vijave të fushës dhe u përplas fort me pjesën e pasme të kokës në një mur pranë tribunave.

Vendimi për mbylljen e përkohshme të fushave mban firmën e nënkryetarit të Bashkisë për Kulturën, Sportin dhe Rininë, Christos Bosbotis.

Bashkia ka kërkuar një rikontroll të menjëhershëm të infrastrukturës sportive, me qëllim verifikimin nëse përmasat e fushave dhe distancat e sigurisë nga muret apo objektet e tjera të palëvizshme përmbushin standardet e Federatës Greke të Futbollit.

Fusha ku ndodhi tragjedia dhe muri ku u përplas i ndjeri. Foto: Konstantin Tastsoglou

Edhe pse lejet e përkohshme të këtyre fushave ishin lëshuar vetëm gjatë gjysmës së dytë të shtatorit, ato tashmë janë pezulluar derisa të përfundojnë kontrollet dhe ndërhyrjet e nevojshme.

Në rast se konstatohen devijime nga standardet e sigurisë, zhvillimi i ndeshjeve dhe stërvitjeve do të duhet të marrë miratim të posaçëm nga Federata Greke e Futbollit.

Vendimi u është komunikuar gjithashtu autoriteteve policore dhe Sekretariatit të Përgjithshëm të Sportit.

Asllan Gjana

Si ndodhi aksidenti fatal

Ngjarja që tronditi komunitetin lokal ndodhi në fushën e Panagias, në Thasos.

Gjatë minutave të para të ndeshjes ndaj Aiantas Panagias Prinou, 16-vjeçari po ndiqte topin pranë vijës anësore, kur doli jashtë fushës dhe u përplas me forcë me pjesën e pasme të kokës në një mur të tribunës.

Ai u transportua në Spitalin e Përgjithshëm të Kavalas dhe u shtrua në terapi intensive me dëmtime shumë të rënda në kokë.

Pavarësisht përpjekjeve të mjekëve, i riu ndërroi jetë dy ditë më vonë.

Vdekja e tij shkaktoi tronditje të madhe në komunitetin lokal dhe në botën e sportit.

Hetime për kushtet e sigurisë

Rrethanat e aksidentit po hetohen nga Policia e Thasos dhe Prokuroria e Kavalas.

Në qendër të hetimit është procedura e licencimit të fushës ku ndodhi ngjarja dhe nëse masat e sigurisë përmbushnin standardet e kërkuara.

Tragjedia ka shkaktuar gjithashtu reagime të forta në Kavala.

Nxënës dhe të rinj kanë zhvilluar një marshim proteste, duke kërkuar ambiente sportive moderne dhe të sigurta.

Vendimi për mbylljen e 11 fushave konsiderohet masa e parë konkrete e autoriteteve lokale pas vdekjes së 16-vjeçarit, ndërsa kontrollet e infrastrukturës sportive pritet të vazhdojnë. /noa.al