Një ngjarje me motive xhelozie është regjistruar të martën, më 6 tetor, në Halkidha të Greqisë, ku një 37-vjeçare shqiptare dyshohet se sulmoi partneren e re të ish-bashkëshortit të saj.

Sipas mediave greke, 37-vjeçarja hyri në banesën e një 23-vjeçareje me shtetësi rumune, e cila raportohet se është partnerja aktuale e ish-bashkëshortit të saj.

Fillimisht mes dy grave shpërtheu një debat i fortë verbal, i cili shumë shpejt përfundoi në përleshje fizike.

Sipas të dhënave të hetimit policor, 37-vjeçarja kishte me vete një brisk prerës dhe gjatë konfliktit dyshohet se e përdori atë ndaj 23-vjeçares.

E reja pësoi plagë në gishtat e dorës së majtë teksa përpiqej të mbrohej.

Por episodi nuk përfundoi këtu.

37-vjeçarja e goditi 23-vjeçaren në kokë, e rrëzoi dhe e tërhoqi në dysheme, ndërsa më pas i preu me brisk një pjesë të flokëve.

Para se të largohej nga banesa, ajo i mori edhe telefonin celular 23-vjeçares.

Viktima u transportua në Spitalin e Përgjithshëm të Halkidhës, ku mori ndihmën e parë dhe trajtimin e nevojshëm për plagët e marra.

Policia nisi kërkimet dhe arriti të lokalizonte dhe arrestonte 37-vjeçaren shqiptare.

Ndaj saj është ngritur dosje penale dhe ajo është dërguar përpara prokurorit.

E akuzuara kërkoi dhe mori afat për t’u përgatitur për dhënien e dëshmisë së saj lidhur me ngjarjen. /noa.al