TIRANË, 8 Tetor 2026 – Kuvendi i Shqipërisë mblidhet sot në orën 10:00 në një seancë plenare maratonë, e cila përmban 18 pika në rendin e ditës. Në qendër të diskutimeve parlamentare do të jenë katër interpelanca me anëtarë të kabinetit qeveritar, reforma administrativo-territoriale, si dhe ngritja e një komisioni hetimor për sektorin e mbrojtjes.

Seanca pritet të nisë me një interpelancë urgjente me ministrin e Punëve të Brendshme, Ervin Demo, të kërkuar nga deputetët e Partisë Demokratike. Më pas, punimet do të vijojnë me dy interpelanca me ministrin e Infrastrukturës dhe Energjisë, Enea Karakaçi, të kërkuara nga deputetët Ermal Pacaj dhe Tedi Blushi, si dhe me një interpelancë tjetër të kërkuar nga deputeti Blushi me ministrin e Financave, Petrit Malaj.

Ndër pikat kryesore të rendit të ditës është shqyrtimi i projektligjit "Për ndarjen administrativo-territoriale të njësive të qeverisjes vendore", si dhe projektvendimi për ngritjen e një komisioni hetimor parlamentar. Ky komision do të kontrollojë ligjshmërinë e veprimtarisë së shoqërisë shtetërore "KAYO" sh.a., lidhur me marrëveshjet e bashkëpunimit, prodhimin, importin, eksportin dhe tregtimin e armëve, municioneve e pajisjeve ushtarake.

Në rendin e ditës përfshihen gjithashtu ratifikimi i Konventës së Këshillit të Evropës për Mbrojtjen e Profesionit të Avokatit, marrëveshja me Maqedoninë e Veriut për pikat e përbashkëta kufitare, ndryshimet në ligjin për sistemin bankar, mbrojtjen e mjedisit dhe pronësinë industriale, si dhe rishikimi i përbërjes së komisioneve të përhershme parlamentare.