TIRANË, 8 Tetor 2026 – Vendi ynë sot do të ndikohet nga kushte atmosferike kryesisht të paqëndrueshme, ku moti parashikohet me vranësira mesatare deri të dendura, si dhe me intervale me kthjellime kryesisht në zonën e qendrës dhe në jug.

Vranësirat do të shoqërohen me reshje shiu të herëpashershme me intensitet të ulët në një pjesë të madhe të territorit. Ndërkohë, në zonën e veriut dhe pjesërisht në qendër, reshjet do të jenë hera-herës në formën e shtrëngatave, të shoqëruara edhe me shkarkesa elektrike.

Era do të fryjë nga drejtimi juglindje – verilindje me një shpejtësi mesatare prej 9 m/s, ndërsa përgjatë vijës bregdetare dhe në zonat luginore shpejtësia e saj pritet të arrijë deri në 20 m/s. Valëzimi në dete parashikohet të jetë i forcës 3 deri në 5 ballë.