TORINO, 7 Tetor 2026 – Detaje të reja janë zbardhur nga hetimet mbi vrasjen e 55-vjeçarit shqiptar Mikel Rroku, i cili u gjet i pajetë në banesën e tij në rrugën "Verolengo" në Torino. Pas tre muajsh hetime, Karabinierët e Torinos kanë arrestuar ish-bashkëshorten e viktimës, Laura Bordello, 47 vjeçe, dhe partnerin e saj të ri, Duccio Fragiacomo, 52 vjeç, të cilët akuzohen për vrasje të paramenduar dhe të rënduar.

Hetimet zbuluan se çifti, i njohur në një qendër kujdesi gjatë trajtimit për depresionin, synonte të bashkëjetonte në apartamentin ku jetonte viktima, çka dyshohet se u bë shkak kryesor për krimin. Në telefonat e të dyshuarve u gjetën kërkime në inteligjencën artificiale ChatGPT mbi përdorimin e metadonit për të shkaktuar vdekjen, si dhe mesazhe ku 47-vjeçarja shprehte hapur dëshirën për të eliminuar ish-bashkëshortin.

Sipas rindërtimit të ngjarjes, para sulmit përfundimtar, Fragiacomo kishte udhëtuar drejt Torinos i armatosur me thikë dhe dorezë metalike, por pa arritur të gjente banesën. Më pas, më 30 qershor, çifti e sulmoi Rrokun brenda apartamentit duke e goditur në kokë me një objekt të fortë, që dyshohet të jetë çekiç. Trupi u zbulua më 6 korrik pas alarmit të fqinjëve për erën e rëndë, ndërsa autoritetet ranë në gjurmët e autorëve përmes përgjimeve përpara se ata të realizonin planin për t’u larguar nga Italia.