ANKARA, 7 Tetor 2026 – Një armiqësi më shumë se dydekadëshe mes dy prej organizatave më të fuqishme të krimit të organizuar në Turqi ka marrë fund pas një marrëveshjeje paqeje të ndërmjetësuar nga lideri i Partisë së Lëvizjes Nacionaliste (MHP), Devlet Bahçeli.

Pajtimi mes klanit “Sahinler” dhe atij “Sarallar” u zyrtarizua përmes një ceremonie masive ku morën pjesë mbi 4,000 persona, ku krerët rivalë Sedat Sahin dhe Burhanettin Saral u shfaqën publikisht për të konfirmuar përfundimin e konfliktit. Pamjet e aktivitetit kanë bërë xhiron e rrjeteve sociale, ndërsa në ceremoni u vu re edhe mbështetja e dërguar përmes kurorave me lule nga Sedat Peker, figurë e njohur e botës së krimit që ndodhet në Emiratet e Bashkuara Arabe.

Marrëveshja vjen vetëm një muaj pasi autoritetet turke njoftuan parandalimin e një atentati të organizuar me raketahedhës RPG ndaj Sedat Sahin. Ndërhyrja e drejtpërdrejtë e një figure të lartë politike në shuarjen e gjakderdhjes mes klaneve rivale ka nxitur reagime dhe diskutime të shumta lidhur me ndikimin e politikës në botën e krimit të organizuar në Turqi.