POJSKË, 7 Tetor 2026 – Institucioni i Avokatit të Popullit ka dërguar sot një grup pune të Mekanizmit për Parandalimin e Torturës në burgun e Pojskës, për të monitoruar dhe verifikuar nga afër kushtet në të cilat po vuan dënimin një grua së bashku me foshnjën e saj 4-muajshe, të cilën e ushqen me gji.

Foshnja është akomoduar me nënën në seksionin e posaçëm të këtij institucioni të ekzekutimit të vendimeve penale, ku funksionon edhe një çerdhe. Institucioni i Avokatit të Popullit bëri me dije se gjetjet nga ky inspektim do të bëhen publike pas përfundimit të verifikimeve në terren.

E dënuara është pjesë e një grupi prej pesë grave të dënuara në dosjen e mashtrimit me “call center-a” të drejtuar nga Bruno Çobo, ku përfshihen Elisa Çaçi, e dënuar me 7 vite e 4 muaj burgim, si dhe Rezarta Ibrahimi, Greta Pepa, Antoneta Malo dhe Silvana Veliu, të dënuara me nga 6 vite e 8 muaj burg. Të dënuarat i janë drejtuar Gjykatës së Posaçme me kërkesë për pezullimin e ekzekutimit të dënimit për shkak të kujdesit ndaj fëmijëve të mitur, ndërsa dy nga personat e përfshirë në këtë dosje, Valbona Abedinaj dhe Antoneta Malo, vijojnë të jenë në kërkim.